බලාපොරොත්තුවේ වදන්
1 ” සනසන්න, මාගේ සෙනඟ සනසන්නැ”යි ඔබේ දෙවිඳාණෝ වදාරන සේක.
2 ”කරුණාවෙන් ජෙරුසලම් වැසියන්ට කතා කරන්න;
හඬ නඟා ඔවුන්ට මෙසේ කියන්න: ඔවුන්ගේ වහල්කමේ කාලය දැන් ඉවර වී ඇත;
පව් කමාව ඔවුන්ට ලැබී ඇත.
සියලු පව්වලට දඬුවම දෙගුණය බැගින් සමිඳුන්ගේ හස්තයෙන් ම ඔවුන්ට ලැබී ඇත.”
3 මෙසේ කියන හඬට සවන් දෙන්න: ”වනාන්තරයේ සමිඳුන් හට මාවතක් එළි කරන්න;
පාළුකරයේ අපේ දෙවිඳුන් හට මහ පාරක් සාදන්න.
4 සියලු මිටියාවත් පුරවනු ලබන්නේ ය;
සියලු කඳු හෙල් කපා පහත් කරනු ලබන්නේ ය;
සියලු හෙල් සමතලා කරනු ලබන්නේ ය;
රළු තැන් සුමුදු කරනු ලබන්නේ ය;
5 සමිඳුන්ගේ තේජාලංකාරය එවිට එළිදරව් වන්නේ ය.
සකල මිනිස් වර්ගයා එය නරඹන්නෝ ය.
මෙසේ වදාළේ සමිඳාණෝ ම ය.”
6 ”පණිවුඩයක් ප්‍රකාශ කරන්නැ”යි හඬක් කී ය.
”කුමන පණිවුඩයක් ප්‍රකාශ කරම් දැ”යි මම ඇසීමි.
”සකල මිනිස් වර්ගයා තණ කොළ හා සමාන වෙති;
ඔහුගේ සුන්දරතාව වන මල් මෙන් පහ වී යයි.
7 සමිඳුන්ගේ හුස්ම වැදුණ විට තණ කොළ වියළී යයි;
මල් පර වෙයි.
මිනිස් වර්ගයා ඒ තණ කොළ හා සමාන ය.
8 තණ කොළ වියළෙයි;
මල් පර වෙයි.
එහෙත්, අපේ දෙවිඳුන්ගේ වචනය සදහට ම පවතියි.”
9 සියොන්ට සුබ ආරංචිය ගෙනෙන දූතයාණෙනි,
උස් කන්දට නඟින්න;
සියොන්ට සුබ ආරංචිය දන්වන්න.
ජෙරුසලමට සුබ ආරංචිය ගෙනෙන දූතයාණෙනි,
හඬ නඟා ප්‍රකාශ කරන්න;
බිය නොවී උස් හඬින්, ”ඔබේ දෙවිඳාණෝ වඩින සේකැ”යි ජුදාහි නගරවලට ප්‍රකාශ කරන්න.
10 මහෝත්තම දෙවි ස්වාමීන් වහන්සේ බලපරාක්‍රමයෙන් වඩින සේක.
වික්‍රමයෙන් පාලනය කරන්න වඩින සේක.
ත්‍යාගයන් එතුමාණෝ තමන් සමඟ ගෙන එන සේක.
තම සෙනඟට විපාකයන් ප්‍රදානය කරන සේක.
11 එඬේරෙකු සේ එතුමාණෝ, තම රැළ පෝෂණය කරන සේක;
දෑතින් බැටළු පැටවුන් වඩාගෙන, ළයෙහි උන් හොවාගෙන යන සේක;
කිරි දෙන බැටළුදෙනුන්ට මඟපෙන්වන සේක.
අසමසම මැවුම්කාරයාණෝ
12 මුහුදේ ජලය අල්ලට ගන්නත්, අහසේ දිග වියතකින් මනින්නත් කිසිවෙකුට හැකි ද?
පොළොවේ පස් හුණ්ඩුවක දමන්නත්, කඳු හෙල්වල බර තරාදියකින් කිරන්නත් කිසිවෙකුට හැකි ද?
13 කළ යුතු දේ සමිඳුන්ට කියා දෙන්නත්, එතුමන්ට ගුරුකම් හා අවවාද දෙන්නත්, කිසිවෙකුට හැකි ද?
14 දැනගැන්මත්, අවබෝධයත් ලබාගැනුමටත්, යුතු අයුතු ක්‍රියා මාර්ගය වටහාගැනුමටත් එතුමාණන් සාකච්ඡා කරන්නේ කවරෙකු සමඟ ද?
15 ජාතීහු සමිඳුන් හට කළයෙන් හැළෙන දිය පොදක් ද තරාදියේ ඇති ධූලි බිඳක් ද හා සමාන ය.
දුර පිහිටි දිවයින් තරාදියේ කිරා බලන ධූලි පිඬක් හා සමාන ය.
16 සමිඳුන් හට දවන යාග පූජාවක් කරන පිණිස ලෙබනොන් වනයේ සියලු ගස් වත් දරට නොසෑහේ.
එහි සියලු සත්තු පූජාවට නොසෑහෙති.
17 සමිඳුන් ඉදිරියේ, සියලු ජාතීහු කිසි වටිනාකමක් නැත.
ඔව්හු හිස් ය;
ඔවුන්ගේ කිසි වැදගැම්මක් නැත.
18 දෙවිඳාණන් කවරෙකුට සමකළ හැකි ද?
එතුමන්ගේ හැඩ රුව කෙසේ විස්තර කළ හැකි ද?
19 කම්කරුවෙකු වාත්තු කළ, රන්කරුවෙකු රන් ආලේප කළ රිදී දාමයෙන් සරසන ලද පිළිමයකට එතුමන් සමාන නැත.
20 වත්කම් ඇති මිනිසෙකු නොදිරන ලීයක් සපයා ගෙන, නිපුණ කම්කරුවෙකු යොදවා ගෙන, තිරසර ලෙස තනාගත් පිළිමයට එතුමන් සමාන නැත.
21 ලෝකය ආරම්භ වූ අන්දම ගැන ඔබ දන්නේ නැද් ද?
අසා නැද් ද? මුල සිට ම ඔබට දන්වා නැද් ද?
22 ලෝකය මැවුයේ, පොළොවෙන් ඉහළ අහසින් එපිට සිංහාසනයේ වැඩ සිටින තැනැන් වහන්සේ ය.
එතුමන්ට ලෝ වැසියන් පෙනෙන්නේ කුරා කුහුඹුවන් සේ ය.
මිහිමත වාසය කරන පිණිස එතුමාණෝ අහස ඇතිරිල්ලක් මෙන් විහිදුවා, කූඩාරමක් මෙන් දිගහැර දුන් සේක.
23 අධිපතීන් නැති නාස්ති කරන්නේත්, ලොවේ පාලකයන් සුණු විසුණු කරන්නේත්, එතුමාණෝ ය.
24 ඔව්හු වනාහි සිටුවා වැඩි කල් නොගිය, පොළොවේ මුල් ඇද නොගත් ළා පැළෑටි හා සමාන ය.
සමිඳාණන් සුළඟක් එවූ විට පිදුරු මෙන් ඒවා වියළී යනු ඇත;
ඉපනැලි මෙන් ගසාගෙන යනු ඇත.
25 සුවිශුද්ධ දෙවිඳුන් සමාන කළ හැක්කේ කවරෙකුට ද?
එතුමන්ට සමාන අන් කිසිවෙක් සිටින්නේ ද?
26 අහස දෙස බලන්න, ඔබට පෙනෙන ග්‍රහ තාරකා මැවුවේ කවරෙක් ද?
හමුදාවන් මෙන් ඒවා ගෙන යන්නේ, ඒවායේ ගණන දැන සිටින්නේ, නම් වශයෙන් ඒවා හඳුනන්නේ දෙවිඳාණෝ ය.
එතුමන්ගේ බලයේ මහත්කම නිසා ද එතුමන්ගේ ශක්තියේ බලවත්කම නිසා ද එයින් එකක් වත් නැති නොවේ.
27 අහෝ, ඉශ්රායෙල් සෙනඟෙනි!
අහෝ, ජාකොබ්ගේ සෙනඟෙනි!
සමිඳාණෝ ඔබේ දුක් නොදන්න සේක කියාත්,
ඔබේ අයිතිවාසිකම් නොසලකන සේක කියාත් ඔබ මැසිවිලි කියන්නේ මන් ද?
28 සමිඳුන්,
සදාතන දෙවිඳුන් බවත්, සකල ලෝකය මැවූ බවත්, එතුමන්ට වෙහෙස මහන්සි නොදැනෙන බවත්, එතුමන්ගේ ප්‍රඥාව අචින්ත්‍ය බවත් ඔබ දන්නේ නැද් ද?
අසා නැද් ද?
29 එතුමාණෝ, ක්ලාන්ත වන අයට ශක්තියත්, බෙලහීනයන්ට සවියත් දෙන සේක.
30 තරුණයෝ පවා දුබල වෙති;
යෞවනයෝ පවා වෙහෙස වී වැටෙති.
31 එහෙත්, සමිඳුන් සරණ යන්නෝ සිය සවිය අලුත් කරගන්නෝ ය;
රාජාලීන් මෙන් පියාපත් විදහා යන්නෝ ය;
ඔව්හු දුවන්නෝ ය;
එහෙත්, වෙහෙස නොවන්නෝ ය;
ඇවිදින්නෝ ය;
එහෙත්, ක්ලාන්ත නොවන්නෝ ය.
