ජනතාව දෙවිඳුන් පැසසීම
ගීතයකි.
1 ලෝ වැසි සියල්ලෙනි, දෙවිඳුන් හට ප්‍රීති ඝෝෂා පවත්වන්න.
2 එතුමන්ගේ කීර්තිමත් නාමයට ගී ගයන්න.
3 දෙවි තුමන්ට මෙලෙස කියන්න:
”ඔබේ ක්‍රියා කොපමණ බියජනක ද?
ඔබේ බලපරාක්‍රමය අතිමහත් ය.
එබැවින් ඔබේ සතුරෝ ඔබ අබිමුව බියෙන් මිරිකෙන්නෝ ය.
4 ලෝ වැසි සියල්ලෝ ඔබ නමදින්නෝ ය;
ඔබට ගී ගයා ඔබේ නම පසසන්නෝ ය.
5 එන්න, දෙවිඳුන්ගේ පුදුම ක්‍රියා නරඹන්න.
එතුමන්ගේ ක්‍රියා මිනිසුන් අතර බියජනක ය.
6 එතුමාණෝ මුහුද වියළි බිමක් කළ සේක.
සෙනඟ එය මැදින් පයින් ගමන් කළෝ ය.
එබැවින් එතුමන් තුළ අපි ප්‍රීති ප්‍රමෝද වන්නෙමු.
7 එතුමාණෝ බලපරාක්‍රමයෙන් සදහට ම ලොව පාලනය කරන සේක;
එතුමාණෝ විජාතීන් දෙස නෙත් යොමා බලන සේක.
කිසි ම කැරලිකරුවෙක් එතුමන්ට එරෙහි ව නොනැඟිටී වා!
8 ජනතාවෙනි, අපේ දෙවිඳුන් හට ආසිරි පතන්න;
එතුමන් වෙත නඟන පැසසුම පතුරුවා හරින්න.
9 එතුමාණෝ ජීවතුන් අතර අප රැක ගත් සේක;
අපේ පාද නොපැකිළෙන්නට සැලැසූ සේක.
10 අහෝ දෙවිඳුනි!
ඔබ අප පරීක්ෂා කළ සේක;
රිදී සෝදිසි කරන පරිදි ඔබ අප සෝදිසි කළ සේක.
11 ඔබ අප දැලට අසු කරගත් සේක;
අපේ කර පිට තද බර පැටවූ සේක.
12 අප පාගා දැමීමට අප සතුරන් හට ඔබ ඉඩ දුන් සේක;
අපි ගිනි මැදින් ද ජලය මැදින් ද ගියෙමු.
එහෙත්, ඔබ අප සුරැකි බිමට ගෙනා සේක.
13 දවන යාග පූජා රැගෙන මම ඔබේ නිවාසයට ඇතුල් වන්නෙමි;
මාගේ බාරහාර මම ඔබට ඔප්පු කරන්නෙමි.
14 මාගේ තොල්වලින් මම ඒ බාරහාර ප්‍රකාශ කෙළෙමි;
මම මාගේ විපතේ දී මා මුවින්
ඒවා උච්චාරණය කෙළෙමි.
15 දැවෙන බැටළු පැටවුන්ගේ සුවඳ දුම් සමඟ තරබාරු සතුන්ගෙන් දවන යාග පූජා පුදන්නෙමි.
මම ගවයන් ද එළුවන් ද පුදන්නෙමි.
16 දෙවිඳුන් නමදින සියල්ලෙනි!
එන්න, සවන් දෙන්න.
එවිට එතුමාණන් මට කළ දේ මම කියා දෙන්නෙමි.
17 මා මුවින් මම එතුමන්ට මොරගැසුවෙමි;
මාගේ දිවෙන් එතුමන්ගේ මහිමය ඉහළින් වර්ණනා කෙළෙමි.
18 වරදට මා හද තුළ ආශාවක් තිබේ නම්, මා සමිඳාණෝ මට කවදාවත් සවන් නොදෙන සේක.
19 එහෙත්, දෙවිඳාණෝ මට සවන් දුන් සේක;
මාගේ අයැදුම් හඬ ද සලකා බැලූ සේක.
20 දෙවිඳුන්ට ප්‍රශංසා වේ වා!
මාගේ අයැදුම එතුමාණෝ ඉවත නොදැමූ සේක;
සිය පෙමින් මා ඈත් නොකළ සේක.
