අන්තරායෙන් මිදීමට යැදුමක්
දාවිත්ගේ සංගීතයකි. සිප්වරුන් පැමිණ, ”බලන්න, දාවිත් අප අතර සැඟවී සිටින්නේ ය”යි සාවුල්ට කී පසු දාවිත් විසින් ලියන ලද අනුශාසනාවකි.
1 අහෝ දෙවිඳුනි, ඔබ නාමයේ අනුහසින් මා මුදාලුව මැනව;
ඔබ බල මහිමයෙන් මා නිදහස් කළ මැනව;
2 දෙවිඳුනි, මාගේ යැදුමට සවන් දුන මැනව;
මා පවසන වදනට ද සවන් දුන මැනව.
3 විදේශිකයෝ මට විරුද්ධ ව නැඟිට්ටෝ ය;
සාහසිකයෝ මා මරන්නට සෙවුවෝ ය.
මාගේ අධිපතියාණන් දෙවිඳුන් බව ඔව්හු නොපිළිගත්තෝ ය.
4 දෙවිඳාණෝ මාගේ සහායට වඩින සේක;
සමිඳාණෝ මාගේ දිවියට රැකවරණය දෙන සේක.
5 මාගේ සතුරන් මට කළ නපුර ඔවුන්ට ම පල දේ වා!
තම විශ්වාසවන්තකම නිසා එතුමාණෝ ඔවුන් සහමුලින් ම වනසාලන සේක් වා!
6 තුටුපහටු සිතින් මම ඔබට පඬුරු පුදන්නෙමි.
සමිඳුනි, සැබැවින් ම ඔබ යහපත් බැවින් මම ඔබේ නාමය පසසන්නෙමි.
7 එතුමාණෝ සැම විපතින් මා මුදා ලූ සේක.
මා දෙනෙතින් මා සතුරන්ගේ විපත දැක මම සතොස් වන්නෙමි.
