සූර්යයා
1 උසස් ස්ථානයෙහි අභිමානය ද, දිළිසෙන අහස් කුස ද වන අහස තේජාන්විත ජවනිකාවෙන් දර්ශනය වන්නේ ය.
2 සූර්යයා උදා වන මොහොතෙහි දී තමා විදහා පාමින් මහෝත්තමයාණන් වහන්සේගේ ක්‍රියාවන් කොපමණ පුදුමාකාර දැ යි කියන්නේ ය.
3 අහසේ මුදුනට පැමිණි විට එය පොළොව වියළවන්නේ ය.
එහි තාපයට විරුද්ධ ව සිටින්නට හැක්කේ කවරෙකුට ද?
4 උණුසුම ලබාගැනීමට මනුෂ්‍යයෙක් උදුන මොළවයි.
එහෙත් සූර්යයා එමෙන් තුන් ගුණයක් කඳු දවා හරින්නේ ය.
ගිනි පුපුරු නිකුත් කරමින් ද තම රශ්මින් විහිදුවමින් ද එය නෙත් අඳුරු කරන්නේ ය.
5 එය මැවූ සමිඳාණෝ උතුම් වන සේක.
උන් වහන්සේගේ වචනය එය සිය කක්ෂයෙහි ශීඝ්‍ර ලෙස ගමන් කරවන්නේ ය.
චන්ද්‍රයා
6 චන්ද්‍රයා ද නිතර නියමිත වේලාවට මාස ලකුණු කරමින් කාලය බෙදා හරින්නේ ය.
7 මංගල්‍යයන් දැනගනු ලබන්නේ චන්ද්‍රයාගෙන් ය.
පුන් සඳට පසු ව ක්‍රමයෙන් පිරිහෙන මෙය ආකාශ වස්තුවකි.
8 මාසයට නම ලැබෙන්නේ ඇගෙන් ය.
ඈ තම කලාවන්හි පුදුමාකාර ලෙස අඩු වැඩි වෙමින් යන්නී ය.
ඈ අහස් සේනාවන්ගේ ජය සංකේතය වන්නී ය.
ඈ අහස් කුසෙහි දීප්තිමත් ලෙස බබළන්නී ය.
තාරකා
9 තාරකාවල මහිමයෙන් අහසේ අලංකාරය ඇති වන්නේ ය.
ඒවා සමිඳුන්ගේ උස් ස්ථානවලට කාන්තිමත් ආභරණයකි.
10 ශුද්ධ තැනැන් වහන්සේගේ වචනය අනුව ඒවා උන් වහන්සේගේ නියමය ප්‍රකාර පවතින්නේ ය;
තමන්ගේ මුර කිරීමේ කාර්යයෙහි නොසැලකිලිමත් නොවන්නේ ය.
දේදුන්න
11 දේදුන්න නරඹා එය සෑදූ තැනැන් වහන්සේට ප්‍රශංසා කරන්න.
එය මහිමාලංකාරයෙන් අතිශෝභන ය.
12 එය අහස හරහා තේජස් කවයක් සාදන්නේ ය.
මහෝත්තමයාණන් වහන්සේගේ අත්වලින් එය අඳින ලද්දේ ය.
සොබාදහමේ අරුමපුදුම
13 තම ආඥාවෙන් උන් වහන්සේ හිම වැටෙන්නට සලසන සේක.
තම නියමය අනුව විදුලි කෙටීම සලසන සේක.
14 එසේ ම උන් වහන්සේගේ ගබඩා විවෘත කරනු ලබන්නේ ය.
වලාකුළු සියොතුන් මෙන් ඉගිලෙන්නේ ය.
15 උන් වහන්සේ තම බලයෙන් වලාකුළු ඝන කරන සේක.
ඒවා හිම කැටවලට කුඩු කරන සේක.
16 හෙණ හඬ ඇසීමෙන් පොළොව වේදනාවෙන් ඇඹරෙන්නේ ය.
උන් වහන්සේ දැක්මෙන් කඳු චලනය වන්නේ ය.
17 උන් වහන්සේගේ කැමැත්ත අනුව දකුණු සුළඟ හමා යන්නේ ය.
උතුරෙන් එන චණ්ඩ මාරුතය හා සුළි සුළඟ හමන්නේ ය.
18 උන් වහන්සේ හදිසියෙන් වහන පක්ෂීන් සේ හිම කැට ඉසින සේක.
ඒ හිම කැට පළඟැටියන් මෙන් වැටෙන්නේ ය.
සුදු පැහැයේ ශෝභාව දැක ඇස පුදුම වන්නේ ය.
එය වැටෙනු දැක සිත මවිත වන්නේ ය.
19 උන් වහන්සේ ලුණු මෙන් පොළොව පිට තුෂාරය ද වගුරුවන සේක.
එය මිදුණු විට කටු මෙන් කෙළින් සිටින්නේ ය.
20 ශීත සුළං උතුරෙන් හමන්නේ ය;
ජල පිට හිම කැට සෑදෙන්නේ ය.
එම හිම කැට නිසල දිය මත ඉස්මතු වන සේ තැන්පත් වන්නේ ය.
ජලය ලෝහ වැස්මක් මෙන් එය පැළඳ ගන්නේ ය.
21 උන් වහන්සේ කඳු වනසාදමන සේක. පාළුකරය දවා හරින සේක.
ගින්නකින් මෙන් වෘක්ෂලතාදිය විනාශ කරන සේක.
22 එහෙත්, මීදුම කාලෝචිත ප්‍රතිකාරයක් වන්නේ ය.
උෂ්ණාධික සමයට පසු නව පණක් දෙන හිම වැටෙන්නේ ය.
23 සිය විචක්ෂණයෙන් උන් වහන්සේ සයුර මෙල්ල කළ සේක.
එහි කොදෙව් පිහිටෙවු සේක.
24 මුහුදෙහි යාත්‍රා කරන්නෝ එහි උවදුරු ගැන කියති.
ඔවුන් කියන දේ අප විස්මයට පත් කරන්නේ ය.
25 එහි පවා අපූර්ව අද්භූත ක්‍රියාවෝ ය.
නා නා විධ සත්තු ය.
මුහුදේ විශාල සත්තු ය.
26 දෙවියන් වහන්සේගේ කරුණාවෙන් සියලු දේ ඉටු වන්නේ ය.
උන් වහන්සේගේ වචනය අනුව සියලු දේ එකට බැඳී පවතින්නේ ය.
27 මේ කාරණය ගැන කිව හැකි තවත් බොහෝ දේවල් තිබුණත්, කොපමණ කීවත් අවසන් කළ නොහැකි ය.
කෙටියෙන් කියතොත් උන් වහන්සේ සියල්ලේ සියල්ල වන සේක.
28 උන් වහන්සේ මහිමයට පත් කිරීමේ දක්ෂතාව අපට කොහින් සොයාගත හැකි ද?
මන්ද, මහෝත්තමයාණන් වන උන් වහන්සේ මැවූ සියල්ලට ඉහළින් වැජඹෙන සේක.
29 උන් වහන්සේ ගාම්භීරත්වයේ බිය දනවන සමිඳාණෝ ය, අත්‍යන්තයෙන් උතුම් ය;
උන් වහන්සේගේ බලය පුදුමාකාරය.
30 ඔබේ ප්‍රශංසාවලින් සමිඳුන්ට ප්‍රශංසා කරන්න.
ඔබට හැකි තරම් එසේ කරන්න. එහෙත් උන් වහන්සේ ඔබ ඉක්මවා යන සේක.
උන් වහන්සේට ප්‍රශංසා කරන්නට ඔබේ මුළු ශක්තිය යොදන්න.
වෙහෙසට පත් නොවන්න.
ඔබ එය අවසාන නොකරන්නෙහි ය.
31 උන් වහන්සේ ගැන විස්තරයක් කිරීමට උන් වහන්සේ දුටුවේ කවරෙක් ද?
සුදුසු ලෙස උන් වහන්සේට ප්‍රශංසා කළ හැක්කේ කාට ද?
32 මේ සියල්ලට වඩා උතුම් තවත් අබිරහස් ඇත්තේ ය.
මන්ද, උන් වහන්සේගේ කෘතීන්ගෙන් ස්වල්පයක් පමණක් අප දුටු හෙයිනි.
33 සමිඳාණෝ සියලු දේ මැවූ සේක.
උන් වහන්සේ බැතිමතුන්ට ප්‍රඥාව දුන් සේක.
